ଆଜି ଶ୍ରୀ ମନ୍ଦିରରେ ଶ୍ରୀକୃଷ୍ଣଙ୍କ ଜନ୍ମ ନୀତି ପାଳନ କରାଯିବ

23

Get real time updates directly on you device, subscribe now.

ପୁରୀ ( ସଂଘର୍ଷ ମିଡିଆ ) : ଭାଦ୍ର କୃଷ୍ଣ ଅଷ୍ଟମୀ ଦିନ ସନ୍ଧ୍ୟାଧୂପ ପୂଜା ଶେଷ ହେବା ପରେ ଜୟବିଜୟ ଦ୍ଵାର ବନ୍ଦ ହୁଏ । ସୁଦୁସୁଆର ସେବକ ଭଣ୍ଡାର ଦ୍ଵାର ଆଗରେ (ଭିତର କାଠ ସମ୍ମୁଖ ଅଞ୍ଚଳ) ପୋଛା ମାରନ୍ତି । ତତ୍ପରେ ପୂଜାପଣ୍ଡା ସେବକ ପାଞ୍ଚ ବର୍ଣ୍ଣ ମୁରୁଜରେ ସର୍ବତ୍ର ଭଦ୍ରମଣ୍ଡଳ କାଟିବେ । ପୂଜାପଣ୍ଡା ବସ୍ତ୍ରରେ ଗୃହ ନିର୍ମାଣ କରିବେ ଦ୍ୱାରଦେଶରେ ଦୁଇଜଣ ଦ୍ଵାରପାଳ ମୂଷଳାୟୁଧ ଧାରଣ କରି ଦଣ୍ଡାୟମାନ ଚିତ୍ର କରାଯାଏ । ପୁନଃ ଷଷ୍ଠୀ ଦେବୀ ସେଠାରେ ଅବସ୍ଥାନ କରନ୍ତି । ମଣ୍ଡଳ ନିକଟରେ ଶାଳ କିମ୍ବା ଶ୍ରୀପର୍ଣ୍ଣ କାଠରେ ଗୋଟିଏ ଭଦ୍ର ପୀଠାସନ ରଖାଯାଏ ସେହି ଆସନ ଉପରେ ଚିତ୍ରପଟ ରଖାଯାଏ । ସେହି ଚିତ୍ରପଟରେ ଗୋଟିଏ ପଦ୍ମ ଅଙ୍କନ ହୋଇଥାଏ । ଏହାପରେ ଗମ୍ଭୀରା ସମ୍ମୁଖ ଅଞ୍ଚଳରେ ପାଣି ପଡି ଧୁଆ ହେବ । ସୁଦୁସୁଆର ମଣ୍ଡଳ ପାଖରେ ପୂଜା ଠା କରିବେ । ପୂଜାପଣ୍ଡା,ପତି ମହାପାତ୍ର ଓ ମୁଦିରସ୍ତ ସେବକ ଜନ୍ମ ଚକଡାରେ ବସି ସଂକଳ୍ପ କରିବେ। ଏହାପରେ କଳସରେ ବରୁଣପୂଜା ହୋଇଥାଏ । ଶ୍ରୀ ମନ୍ଦିରର ଚିତ୍ରକାର ସେବକଙ୍କ ଦ୍ୱାରା ପ୍ରସ୍ତୁତ ହୋଇଥିବା କୃଷ୍ଣଜନ୍ମ ପଟି ଚିତ୍ର ରୂପା ପଦ୍ମ ପାଖଡା ମଣ୍ଡଳ ଉପରେ ରଖାଯାଏ । ପଦ୍ମ ପାଖୁଡ଼ାରେ ନଅ ମୂର୍ତ୍ତି ରଖାଯାଏ ମୂର୍ତ୍ତି ସାମ୍ନାରେ ପନ୍ତି ଭୋଗ ହୋଇଥାଏ ଏହିପରେ ଦକ୍ଷିଣି ଘରୁ ମଦନମୋହନ ଆଣି ରତ୍ନସିଂହାସନ ଉପରେ ବିଜେ କରନ୍ତି ପୂଜାପଣ୍ଡା ଆଗ୍ୟା ମାଳ ପ୍ରଦାନ କରନ୍ତି । ତତ୍ପରେ ମହାଜନ ସେବକ ମାନେ ଶ୍ରୀକୃଷ୍ଣ ପ୍ରତିମାଙ୍କୁ ଆଣି ମଣ୍ଡଳର ପୂର୍ବଭାଗରେ ବିଜେ କରନ୍ତି । ନୈବେଦ୍ୟ ଦ୍ରବ୍ୟ ଶ୍ରୀଜୀଉଙ୍କ ସମ୍ମୁଖରେ ରଖାଯାଇଥାଏ । ପୂଜାପଣ୍ଡା ଶ୍ରୀକୃଷ୍ଣ, ଦେବକୀ ଗର୍ଭରେ ଅଛନ୍ତି, ଏହା ଚିନ୍ତା କରି ବାଳକୃଷ୍ଣ ମନ୍ତ୍ରରେ ପୂଜା କରନ୍ତି । ପୂଜା ଶେଷରେ ରୂପା ପାତ୍ରରେ ହଳଦୀ ପାଣି ଧରି ଦେବକୀଙ୍କ ଗର୍ଭରୁ ଶ୍ରୀକୃଷ୍ଣ ଜନ୍ମ ହେଲେ ଭାବି ତାଙ୍କର ପାଦ ତଳେ ସେହି ହରିଦ୍ରା ଜଳ ଢାଳନ୍ତି । ଦୋଷ କାଟିବା ପାଇଁ ଜିର,ଜାଇଫଳ ଓ ଲବଙ୍ଗ, ତେଜପତ୍ରକୁ ଚୂର୍ଣ୍ଣ କରି ମିଠା ଓ ଗାଈ ଘିଅ ମିଶ୍ରିତ କରି ପ୍ରଭୁଙ୍କୁ ନୈବେଦ୍ୟ କରନ୍ତି । ତତ୍ପରେ ମୁଦିରସ୍ତ ହଳଦିଆ ବସ୍ତ୍ର, ଚନ୍ଦନ ଓ ଦୟଣାମାଳ ଭଗବାନଙ୍କୁ ସମର୍ପଣ କରନ୍ତି । ଏହାପରେ ପୂଜାପଣ୍ଡା ଷୋଡଶ ଉପଚାରରେ ଶୀତଳ ଭୋଗ ମଣୋହୀ କରିଥାନ୍ତି । ପାଳିଆ ମହାସୁଆର ଦୁଧ, ଲହୁଣି ଓ ଗଣ୍ଡୁସ ମସଲା ଦେବା ପରେ ପୂଜାପଣ୍ଡା ସମର୍ପଣ କରି ମଣୋହି କରାଇଥିଲେ । କର୍ପୂର ଆଳତି ପରେ ଭଣ୍ଡାର ମେକାପ ଦେଇଥିବା ଥାଳିରେ କୃଷ୍ଣ (ମଦନମୋହନ) ବିଜେ ହୋଇ ଦେବକୀ ଓ ବସୁଦେବଙ୍କ ସହିତ ଜଗମୋହନ ଦେଇ ସରସ୍ୱତୀଙ୍କ ମନ୍ଦିର ସମ୍ମୁଖସ୍ଥ ଯମୁନା ନଦୀ ପାଖରେ ବିଜେକରିଥାନ୍ତି । ଜଣେ ପୂଜାପଣ୍ଡା ଉଗ୍ରସେନ ବେଶରେ ଭେଟ ହୋଇ ଦଣ୍ଡପ୍ରଣାମ କରନ୍ତି । ଏହି ନୀତି ସମୟରେ ଠାକୁରଙ୍କ ମସ୍ତକ ଉପରେ ବେହେରା ଖୁଣ୍ଟିଆ ସପ୍ତଫେଣୀ ବାସୁକୀ ଧରି ଚାଲିଥିଲେ । ଉଗ୍ରସେନଙ୍କ ଦଣ୍ଡପ୍ରଣାମ ପରେ ମୁଦିରସ୍ତ ପ୍ରସାଦ ଲାଗି କରନ୍ତି । ଏହାପରେ ନାଭିକଟା ମଣ୍ଡପଠାରେ ମଦନମୋହନ ଖଟଶେଯ ଉପରେ ବିଜେ କରନ୍ତି । ତାଙ୍କ ସହିତ ରାମକୃଷ୍ଣ ବିଜେ ହୁଅନ୍ତି । ଏହାପରେ ପୂଜାପଣ୍ଡା ନାଭିଚ୍ଛେଦ କରି ମହାସ୍ନାନ ବଢ଼ାଇଥିଲେ । ମହାଜନ ସେବକ ଠାକୁରଙ୍କୁ ଜଗମୋହନରେ ଲଗାଯାଇଥିବା ଦୋଳିରେ ବିଜେ କରନ୍ତି । ମଦନମୋହନ ରାମକୃଷ୍ଣ ଦୋଳିରେ ବିଜେ କରିବା ପରେ ଶୀତଳ ଭୋଗ ସମ୍ପନ୍ନ ହେବ । ଏହାପରେ ଭିତରେ ପାଣିପଡ଼ି ବଡ଼ସିଂହାର ଭୋଗ ଓ ପହୁଡ଼ ନୀତି ସମ୍ପନ୍ନ ହେବ । ପୁରୀରୁ ଶଙ୍କର ସରକାରଙ୍କ ରିପୋର୍ଟ ସଙ୍ଘର୍ଷ ନ୍ୟୁଜ୍ ।

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More