ମାଲିକ ପ୍ରତି କୁକୁରର ବିଶ୍ଵସ୍ତତା : ପରଲୋକଗତ ମାଲିକଙ୍କୁ ୩ ମାସ ହେଲା ଉହାନ ଡ଼ାକ୍ତରଖାନାରେ ଚାହିଁ ବସିଛି ପୋଷା କୁକୁର

ଉହାନ: ମାଲିକ ପ୍ରତି କୁକୁରର ବିଶ୍ବସ୍ତତା ସର୍ବଜନବିଦିତ । ବିଶ୍ବରେ ଏ ନେଇ ଅନେକ କାହାଣୀ ରହିଛି, ଉଦାହରଣ ବି ଅନେକ । ମାତ୍ର ଗୋଟିଏ ସାନ କୁକୁର ଛୁଆ ତା’ର ମାଲିକର ବାଟ ଚାହିଁ ୩ ମାସ ହେଲା ଏକ ଡ଼ାକ୍ତରଖାନାରେ ବସି ରହିବା ଘଟଣା ଅନେକଙ୍କ ହୃଦୟକୁ ତରଳାଇ ଦେବ । ଘଟଣାଟି ଘଟିଛି ଚୀନର ସବୁଠାରୁ କରୋନାଗ୍ରସ୍ତ ଅଞ୍ଚଳ ଉହାନରେ । ଉହାନର ଏକ ଡ଼ାକ୍ତରଖାନାରେ ମୋଙ୍ଗରାଲ ପ୍ରଜାତିର ଏହି କୁକୁର ଛୁଆଟି ତାର ମାଲିକଙ୍କୁ ୩ ମାସ ହେଲା ଅପେକ୍ଷା କରିଛି । କିନ୍ତୁ ବିଡ଼ମ୍ବନା ହେଉଛି ତା’ର ମାଲିକ ଆଉ ଏ ଦୁନିଆରେ ନାହାନ୍ତି ସେ କଥା କୁକୁରଛୁଆଟିକୁ ଜଣା ନାହିଁ । ଡ଼ାକ୍ତରଖାନାରେ ଭର୍ତି ହେବାର ୫ ଦିନ ପରେ ତାର ମାଲିକ କରୋନାରେ ମୃତ୍ୟୁବରଣ କରିଛନ୍ତି ଏ କଥା ବି ସେ ବୁଝିପାରି ନାହିଁ । କୁକୁରଟିର ଫଟୋ ସୋସିଆଲ ମିଡ଼ିଆରେ ଭାଇରାଲ ହେବା ପରେ ତାକୁ ଡ଼ାକ୍ତରଖାନ କର୍ତ୍ତୃପକ୍ଷ ଏକ କୁକୁର ଆଶ୍ରୟସ୍ଥଳକୁ ପଠାଇ ଦେଇଛନ୍ତି । ହେଲେ ମୂକ ପଶୁଟିର ମାଲିକ ପ୍ରତି ଭଲପାଇବା ଓ ବିଶ୍ବସ୍ତ ଭାବ ଅନେକଙ୍କ ହୃଦୟକୁ ତରଳାଇ ଦେଇଛି ।